Unha coprodución coa compañía Aporía Esccénica.

Como cambia a nosa vida cando chega un novo ser a ela? Corréspondense a realidade co imaxinado previamente? Ata que punto nos transforma e nos enriquece formar unha familia? Cales son as dificultades, os desafíos, as crises que se nos presentan como nais e pais nunha sociedade complexa como a contemporánea? Como compaxinamos a itinerancia e inestabilidade das artes escénicas coas esixencias da crianza? Estamos preparadas para asumir todos os retos e imprevistos con creatividade? 

A FAMILIA REAL confróntase con todos estes aspectos en escena co obxecto de traspasar os límites, cuestionar ideas preestablecidas ao redor da maternidade e a educación, compartir as nosas satisfaccións e aprendizaxes, evidenciar as contradicións diarias e, sobre todo, poñernos a proba coma intérpretes, integrando nas táboas aos máis pequenos da familia, deixándolle liberdade para modificar o seu itinerario de acción con espontaneidade en contraste coa partitura ensaiada e teatralizada dos adultos. 

Partindo da comicidade, irreverencia e contradición do título que remite a imaxe artificiosa da realeza, mergullámonos a fondo no “real” do núcleo familiar desde múltiples perspectivas vivenciais que enriquezan o espectáculo e nos aporten unha imaxe plural: unha nai solteira que se debate entre o amor, o estrés e a culpa por non poder pasar máis tempo co seu fillo de oito anos que quere coñecer o seu pai; unha nai separada e multiempregada cunha filla de 9 anos e unha relación cordial co seu exmarido que presume de ser a renovadora do arquetipo da madrastra; un matrimonio heterosexual estábel e feliz cunha filla de once anos e un fillo de ano e medio que reflexionan sobre as súas obsesións e prexuízos; unha parella heterosexual namorada, insegura e alternativa cun bebé recén nacido que descoñecen o que lle depara o futuro inmediato.